Bertsolaritza: "Zonbait behako"

About the event

Bertsolaritza: "Zonbait behako" llega a Biarritz. Bertsolaritzaren munduan murgiltzera eramaten gaitu erakusketa honek. Euskal kultur erakundeak ekoiztu du. Bertsolaritza ezagutzen ez dutenei ahozko arte honen ulertzeko zonbait gako eskainiko dizkie. Bertsozaleek, aldiz, lekukotasun eta artxibo-irudi arraroen ikusteko parada ukanen dute. Tradizio honi buruzko "Iparraldeko" behakoa proposatzen da batez ere erakusketan. Erakusketan ikusgai diren edukiak Erakusketa lau dorre multimediaz osatua da. Orotara bi oren inguru ikus-entzunezko pasarte/erreportaje ikusteko parada eskaintzen dute. "What is bertsolaritza? - Zer da bertsolaritza?" (Urtea: 2019) Bertsolaritza nazioartean ezagutzera emateko xedea duen ikus-entzunezkoa da "What is bertsolaritza?" . Bertsolaritzaren testuingurua azaldu eta bere deskribapena egiteaz gain, bertsoaren sormen prozesua bera ere azaltzen du 20 minutuko ikus-entzunezkoak. Etxepare Euskal Institutuak eta Mintzola Ahozko Lantegiak elkarlanean ekoiztu zuten 2019an. Ikuska 18 : Xabier Amuriza (Egilea: Antxon Ezeiza - Urtea: 1984) 1980ko Bertsolari Txapelketa Nagusiko finalean "Aita izena kanta beharrak" bertsoak nola asmatu zituen Xabier Amuriza (1941, Amorebieta-Etxano) txapeldunak erakusten digu hamar minutuko dokumental honek. 1980ko hamarkadan bertsolaritzaren arraberritzaile izan zenari omenaldi ederra. Maite Barnetche kazetariaren artxiboetan Maite Barnetche (1941-1986) 1970 urteetan euskarazko telebistaren aitzindari izan zen. FR3 frantses katean "Euskal Herria orai eta gero" emankizuna zuzendu eta aurkeztu zuen 1971tik 1986 arte. Egiazko altxorrak daude Frantziako entzun-ikusen erakundearen jabegoan (INA) diren dokumentu horietan. Bertsolaritza eta ohiko kantua aipatzen dituen emankizun bat hautatu dugu. Erakusketaren bisitatzeak balio du, horren ikusteko baizik ez bada ere! "Agur eta ohore Mattin Ahetzekoari" (1978) emankizun honen gaia Martin Treku "Mattin" (1916-1981) bertsolaria da. Ahetzen ikusten da lanean bere etxaldean, Mayi emazte eta Jean-Pierre semearekin. Donibane Lohizuneko ostatu batean ere ikus daiteke, lagun batzuekin, hala Xanpun, nola Txomin Ezponda. Eleketa , bertsolaritzaren Ipar Euskal Herriko ahozko memoria 2007. urteaz geroztik, Pirinio Atlantikoetako Departamenduaren obralaritzaren pean, Euskal kultur erakundeak "Eleketa" izeneko Ipar Euskal Herriko ahozko memoriaren ikus-entzunezko bilketa programa handi bat darama. Bertsolaritzari buruzko 30 bat lekukotasun-zati hautatu ditugu gure datu-basean. Iparraldeko zonbait behako eskaintzen dizkigute. Badihardugu elkarteak (Gipuzkoa) Ahotsak programaren baitan grabatu testigantzek osatzen dituzte. Ukipen-pantaila baten bitartez kontsulta daitezke. Bost sail handitan sailkatuak dira: Iparraldeko tradizioari zonbait behako Bertsolarien bizipenak Bertsolaritzaren eskolan Bertsolaritzaren garapenak eta aldaketak Antolatzaileak, epaileak eta gai-jartzaileak Entzungai diren lekukotasunen artean: Antolatzaile edo epaile lanetan aritu direnak: Beñat Soule (1947-), Pierre-Arnaud Idieder (1957-2020), Jean-Louis Harignordoquy (1954-), Mixel Itzaina (1933-2025), Émile Larre (1926-2015) Bertsolariak: Txomin Ezponda (1937-), Jesus Arzallus (1954-), Sustrai Colina (1982-), Maddi Ane Txoperena (1994-), Michel Aire (1944-2025), Jean-Louis Harignordoquy (1954-), Odei Barroso (1988-), Alexandre Etcheberry (1931-2018) Bertsolarien hurbilekoak: Petra Ibarra (1931-), Marie-Christina Oçafrain (1955), Anttonie Sein (1926-), Allandu Bordazarre (1936-) Xilaba txapelketako finala gogoan… Neurri handiko 10 argazkik Bertsularien lagunak elkarteak antolatu Xilaba 2025 txapelgoa dakarzkigute gogora. Baionako Etxepare lizeoko bertso eskolako Johane Larre-k egin argazki-erreportaje batetik datoz . Begi kliska bat bezala Lapurdi, Baxenabarre eta Lapurdi elkartzen dituen txapelketaren azken edizioari.